तांबाराजुरी जि.प.केंद्रीय प्राथमिक शाळा येथील विद्यार्थ्यांनी अनुभवला आठवडी बाजार

 

कोणी विकले पोहे;तर कोणी विकले दही धपाटे

पाटोदा: प्रतिनिधी 

पाटोदा तालुक्यातील जिल्हा परिषद केंद्रीय प्राथमिक शाळा  तांबाराजुरी मध्ये बुधवार (दि.10) रोजी कोणी वडापाव, शाबू वडे, पोहे विकले,कोणी दही धपाटे विकले तर कोणी आपल्या शेतातील भाजीपाला विकून आठवडी बाजाराचा अनुभव घेतला.

विद्यार्थ्यांना व्यावहारिक ज्ञान मिळावे या उद्देशाने यंदाही जिल्हा परिषद केंद्रिय प्राथमिक शाळा तांबा राजुरी आयोजित आठवडी बाजाराचे आयोजन करण्यात आले. या बाजारात जवळ - जवळ सात ते आठ हजारापर्यंत उलाढाल झाली.

73 विद्यार्थी संख्या असलेल्या जिल्हा परिषद केंद्रीय प्राथमिक शाळा तांबाराजुरी  शाळेतील पहिली ते चौथीच्या विद्यार्थ्यांनी या बाजाराचे नियंत्रण केले.मुलांनी आपल्या शेतातून आणलेला भाजी-पाला कांदे,बटाटे ,कोथिंबीर, टोमॅटो, भेंडी, गवार, लसूण, पेरू, लिंबू, केळी यासह खाद्यपदार्थांमध्ये दही धपाटे, शाबु वडे, वडापाव, मसाला पापड, पोहे, भजे,बिस्किट, चॉकलेट, चिक्की आदी पदार्थ विद्यार्थ्यांनी बाजारात विक्रीसाठी  ठेवले होते.

बाजारातून गावातील महिला व पुरुष, पालक, ग्रामस्थ यांनी आवर्जून लहान मुलांकडून खरेदी केली.

यावेळी शालेय व्यवस्थापन समितीचे अध्यक्ष श्री संतोष तांबे, उपाध्यक्ष श्री बबन पवार सर, केशव तांबे, गणेश तांबे ग्रा पं सदस्य, विलास तांबे, धनंजय तांबे, विकास तांबे, दत्ता तांबे, जयदत्त तांबे आदी ग्रामस्थांनी बाजाराला भेट देऊन मुलांचे कौतुक करून खरेदी केली. तसेच महिलांची उपस्थिती विशेष होती, सर्व महिलांनी चिमुकल्यांकडून खरेदी केली.

यावेळी बोलताना मुख्याध्यापक सोंडगे सर म्हणाले की, विद्यार्थ्यांना पुस्तकी ज्ञानाबरोबरच व्यावहारिक ज्ञान मिळावे यासाठी शिक्षकांच्या संकल्पनेतून आठवडी बाजार उपक्रम राबविण्यात आला. यातून विद्यार्थ्यांना खरोखरच खूप काही शिकायला मिळते. सोबतच गणित विषयाशी निगडित अन्य व्यावहारिक ज्ञानही त्यांना मिळते.शाळेमध्ये विविध उपक्रम आम्ही नेहमीच राबवत असतो,यापुढेही राबवले जातील असे मुख्याध्यापक सोंडगे सर यांनी याप्रसंगी बोलताना सांगितले.

हा उपक्रम यशस्वी करण्यासाठी तांदळे सर, गाडेकर मॅडम,राठी मॅडम यांनी परिश्रम घेतले.